Eldar Mahmudovun şahanə sarayı - FOTOLAR
Prezident İlham Əliyev Eldar Mahmudovu vəzifəsindən azad edəndən sonra sabiq milli təhlükəsizlik nazirin və onun cinayətkar komandasının iş adamlarının başına açdıqları oyunlar haqda ölkə mediasında silsilə yazılar davam etməkdədir. “Qafqazinfo” bir neçə gün əvvəl Eldar Mahmudova məxsus olan şərab evindən - “Wine City” mağazalar şəbəkəsindən geniş reportaj hazırlamışdı. Reportajın böyük əks-sədaya səbəb olmasını nəzərə alan sayt keçmiş nazirin Badamdardakı sarayından reportaj hazırlayıb. Həmin reportajı təqdim edirik.
***
MTN-in keçmiş rəhbərinin evinin yerləşdiyi məhəlləyə daxil olduq. Qonşulardan eks-nazirlə bağlı nəsə soruşmaq istəyirdik ki, aldığımız cavab belə oldu: “Bu məhəllədə onun adını çəkmək olmur. Çünki o, bütün danışıqları dinlətdirir. Biz öz canımızdan bezməmişik”. Daha sonra isə adı rüşvət və korrupsiya əməllərində hallanan sabiq məmurun evinə yaxınlaşmağa cəhd etdik. Sözün əsl mənasında villaların içində möhtəşəm iqamətgahın önündə durduq. Uzun cəhdimizdən sonra axır ki, ətrafdakı insanlarla ünsiyyətimiz alındı. İlk sualımıza cavab belə oldu: “Biz bildiyimizə görə, bura Eldar müəllimin hər gün əsgərlərin keşik çəkdiyi qərargahıdır”.
Daha sonra söhbətlərinə belə davam ediblər: “Ötən gün evin ətrafına polis maşınları yığılmışdı. İçəridə yoxlama aparılır. Bu məhəllədə ən bahalı villa Eldar Mahmudova məxsusdur. Evin hər tərəfi kameradır. 4 mərtəbəlidir. Onun yerin altında da mərtəbələrinin olduğunu eşitmişik. Bu məhəllədə adi birotaqlı kirayə evin qiyməti 250 manatdır. Gör bu villa üçün o, neçə milyard pul xərcləyib. Evinin qaşısındakı o bağı görürüsünüzmü? Eldar Mahmudov hər axşam o bağda ağaclara qulluq edərdi. Barəsində sərəncam çıxandan bəri bu tərəflərə gəlmir. Onun ailəsi də bu evdə qalırdı.
Evdə çoxlu fəhlələr işlədirdilər. Fəhlələrin maaşını vermirdilər. İki gün olar ki, bütün fəhlələr işdən çıxıb evlərinə gediblər. Biz elə bilirdik bura onun qərargahıdır. Evin dörd tərəfini əsgərlər qoruyurdu. İndi heç bir əsgər yoxdur. Evinin qabağındakı bu yaşıl düzəngah isə onun bağıdır. O, bağında ceyran heykəli də qurdurub. Bağın 80-90 sot sahəsi var. Orada bütün ağaclar var.
Ev o qədər böyükdür ki, vallah, bilmirik onun neçə qapısı var. Biz saydığımıza görə evin 5 darvazası var. Həyətində maşınlar üçün lift də var. Liftlə maşınlar evin yuxarı və aşağı qatlarına enə bilirlər. Liftin üzü çox bahalı metaldan hazılanıb. Deyilənə görə, həmin metal qızıldan hazırlanıb.
O, işdən çıxmamışdan öncə hər gecə evə gələrdi. Həyətində 10-a yaxın bahalı maşın olardı. İndi də tez-tez evə bahalı maşınlar daxil olur. Villanın həyətində istirahət üçün bütün şərait yaradılıb. Orada idman meydançası da qurulub. Məhəllənin bütün yolları pis gündədir. Palçıq içindədir. Amma onun evinin önündə yol çəkilib. Bütün mülk iri divarlarla hasarlanıb.
Eldar Mahmudovun evinin adi dam hissəsi məhlədəki bütün evlərin qiymətindən bahadır. İndi evdə bir-iki nəfər qalır. İşdən çıxarılandan sonra biz onu buralarda görməmişik. Burada danışmaq çox təhlükəlidr. O, səsimizi yazdıra bilər”.
Daha sonra isə sabiq nazin evinin qapısına yaxınlaşdıq. Amma bilmədik ki, neçənci qapını döyək. Bağın qabağındakı kişiyə yaxınlaşmaq istədik. Gördük ki, kişi oturduğu stulda yatır...
