Polad Bülbüloğlu: “Rusiya Dağlıq Qarabağ münaqişəsinin həlli üçün bütün imkanlara malikdir”
Moskvada Rusiya Federasiyasının Federal Məclisinin həftəlik nəşri olan "Parlamentskaya qazeta"nın ("Парламентская газета") Mətbuat Mərkəzində Azərbaycanın dövlət müstəqilliyinin 25 illiyinə həsr edilmiş "Rusiya-Azərbaycan münasibətləri: Dostluq və qarşılıqlı faydalı əməkdaşlığın 25 ili" mövzusunda dəyirmi masa keçirilib.
Müzakirələrdə Azərbaycanın Rusiyadakı səfiri Polad Bülbüloğlu, Federasiya Şurasının Beynəlxalq işlər üzrəkomitəsinin üzvü İqor Morozov, Dövlət Dumasının deputatı Dmitriy Savelyev, Siyasi Araşdırmalar İnstitutunun direktoru Sergey Markov və digərləri iştirak ediblər.
Çıxış edən səfir Polad Bülbüloğlu bildirib ki, 25 illik müstəqillik dövründəAzərbaycan uzun inkişaf yolu keçərək, Qafqaz regionunun iqtisadi cəhətdən ən güclü ölkəsinə çevrilib.
P.Bülbüloğlu 1990-cı illərin hadisələrini xatırladaraq bildirib ki, o vaxtlar polkovnik Surət Hüseynovun tankları Bakıdan 50 km aralıda idi: "Məhz Azərbaycan xalqının təkidi ilə ümummilli lider Heydər Əliyev o dövrdə ölkəni vətəndaş müharibəsindən xilas edib və Azərbaycan dövlətçiliyini yenidən qurub".
Dağlıq Qarabağ münaqişəsinə də toxunan P.Bülbüloğlu deyib ki, Rusiya, ATƏT-in Minsk qrupunun üzvü və regionun ən böyük dövləti kimi, Dağlıq Qarabağ münaqişəsinin həlli üçün bütün lazım olan imkanlara malikdir.("Report”)
