Nazir müavini: "Azərbaycan bundan sonra da neftin bahalaşmasına öz töhfəsini verəcək"
"APA-Economics" xəbər verir ki, bunu energetika nazirinin müavini Natiq Abbasov Bakıda keçirilən "Argus Azərbaycan Beynəlxalq Neft Sammiti - 2017"-də çıxışı zamanı bildirib.
Onun sözlərinə görə, OPEC üzvləri və kartelə daxil olmayan ölkələr sazişin müddətinin 2018-ci ilin birinci rübün sonunadək uzadaraq neftin bahalaşmasına növbəti dəstəyi verəcək: "Bu gün neftin qiymətində volatilliyin azalması, tədricən qiymətdə sabitləşmə OPEC çətiri altında müzakirələrə qatılmış hər bir ölkənin uğurudur. Razılaşdırılmış bəyannaməni imzalayan, sazişə qoşulan, neftin qiymətinin sabitləşməsi məqsədi ilə təşkilat tərəfindən irəli sürülən təşəbbüslərə ilk vaxtdan qoşulan Azərbaycan bu günədək öz öhdəliklərini tam yerinə yetirir. Azərbaycan neft bazarında qiymətlərin sabitliyinə və neftlə bağlı məsələlərin nizamlanmasına bundan sonra da öz töhfəsini verəcək".
