“Unun kisəsi 42-43 manat olacaq, bu, dövlətdən asılı məsələ deyil, taxılı idxal edirik” - Vahid Əhmədov
Bu sözləri Pravda.az-a açıqlamasında Milli Məclisin deputatı Vahid Əhmədov deyib.
Deputat bildirib ki, Azərbaycanda qiymət artımı gözlənilən idi: “Hələ bir müddət əvvəl iqtisadiyyat naziri məlumat vermişdi ki, müəyyən qıtlıq gözlənilir. Artıq qiymətin artacağı aydın idi. Dünən Lvovda Türkiyə Prezidenti Rəcəb Tayyib Ərdoğan, Ukrayna Prezidenti Volodimir Zelenski və BMT-nin Baş katibi Antonio Quterreş arasında keçirilən üçtərəfli görüşdə müəyyən razılığa gəlindi. Artıq Ukraynadan taxılın ixracına geniş imkan yaradılır. Bu gün məlumat aldım ki, buğdanın qiymətində müəyyən enmələr olacaq. Çörəyin, unun qiymətinin belə artması, əlbəttə, sosial vəziyyət üçün problemli məsələdir. Dövlət bütün bunları nəzərə alaraq, müəyyən yardımlara, humanitar məsələlərə gələcəkdə baxa bilər”.
Vahid Əhmədov çörəyin qiyməti artdıqca çəkisinin azaldılması məsələsinə də münasibət bildirib: “Bu fikirlə razıyam, düzdür. 500 qramlıq çörək faktiki olaraq yoxdur, çəksən, hardasa 400 qramlıqdır. Bununla əlaqədar hökumətin müvafiq qurumları işləməlidir. İqtisadiyyat Nazirliyi yanında Antiinhisar və İstehlak Bazarına Nəzarət Dövlət Xidməti var. Düzdür, onlar bu məsələlərə nəzarət edirlər, amma nəzarəti gücləndirmək lazımdır. Çörəyin qiyməti 55 qəpiyə qalxıbsa, 500 qramlıq olmalıdır, 400-450 qram yox. Nəzarətdə saxlanılmalıdır. Çörəyin keyfiyyətində problem yaranmamalıdır. Cənab Prezident İlham Əliyev buğda istehsalı ilə əlaqədar xüsusi göstərişlər verib. Bütün rayonlara, işğaldan azad olunmuş ərazilərdə artıq taxıl əkilib-biçilir. İş gedir, Azərbaycan özünü taxılla təmin edə bilsin. Taxıl strateji məhsuldur, buna görə həmişə diqqət mərkəzində olmalıdır”.
