“Azərbaycanın səbri tükənə bilər” – Deputatdan ermənilərin təklifinə CAVAB
Belə ki, erməni deputatlar tərəfindən səsləndirilən və onların maraqlarına cavab verən ümumilikdə 3 təklif irəli sürülüb:
1. Siyasi məsələlər və təhlükəsizlik üzrə ümumi komitənin qətnamə layihəsinə “Dağlıq Qarabağ münaqişəsi”ni və “ATƏT-in Minsk Qrupu” nu daxil etmək;
2. UNESCO texniki missiyasının qəbul edilməsinə yönəlik çağırış;
3. Ermənipərəst isveçli deputat Bjorn Soderin “saxlanılan erməni hərbiçilərinin dərhal azad olunmasını Azərbaycandan tələb edən” təklifi;
Lakin bütün bu təkliflərə deputatlarımız tərəfindən obyektiv cavab verilib və səsvermədə səs çoxluğu ermənilərin əlehinə olub. Gundeminfo.az xəbər verir ki, mövzu ilə bağlı Bizim.Media-ya açıqlama verən Beynəlxalq münasibətlər və parlamentlərarası əlaqələr komitəsinin üzvü Asim Mollazadənin sözlərinə görə, Azərbaycan bütün beynəlxalq təşkilatlarda həqiqətləri dünyaya çatdırır.
“Beynəlxalq hüquq normalarının pozulması barəsində kifayət qədər məlumatlar verib. Onsuz da Ermənistanın yalanlarına heç kim inanmır”, - deyə deputat əlavə edib.
Asim Mollazadə Azərbaycanın sülh təklifləri qarşısında Ermənistan rəsmilərinin beynəlxalq təşkilatlar qarşısında bu cür məsələləri gündəmə gətirməsini də şərh edib:
“Azərbaycan sülh istəyir və Ermənistanın bu oyunlarını səbrlə izləyir. Lakin məqam ola bilər ki, bizim səbrimiz tükənər. O zaman Azərbaycan Ermənistanı öz üzərinə götürdüyü öhdəlikləri yerinə yetirməyə məcbur edə bilər”.
