Azərbaycanlılar ÜAK-ın bağlanması və Rusiya ilə münasibətlər barədə nə düşünür? - SORĞU
“Atlas” Araşdırmalar Mərkəzi “Azərbaycan-Rusiya münasibətləri və Azərbaycanın xarici siyasətinin yeni prioritetləri” mövzusunda 500 respondent arasında sorğu keçirib.
APA-nın xəbərinə görə, sorğunun birinci sualı belə olub: “Rusiyada azərbaycanlıların dünyadakı ən böyük diaspora təşkilatı olan Ümumrusiya Azərbaycan Konqresinin qeydiyyatının ləğvi iki ölkə arasındakı münasibətlərə necə təsir edəcək?” Suala cavab verənlərin 87%-i Rusiyada azərbaycanlıların ən böyük təşkilatının fəaliyyətinin faktiki qadağan olunmasının Azərbaycan-Rusiya münasibətlərinə mənfi təsir edəcəyini söyləyiblər. Respondentlərin cəmi 8%-i qeydiyyatın ləğvinin münasibətlərə heç bir təsiri olmayacağı düşüncəsindədir. 5% respondent isə suala “bilmirəm” deyə cavab verib.
“Sizcə Rusiyada azərbaycanlıların diaspor təşkilatının fəaliyyətinin qadağan olunmasının arxasında hansı qüvvələr dayanır” sualına cavablar belə olub:
- Rusiya hakimiyyəti – 57%
- Rusiyadakı erməni lobbisinin təsiri altındakı qüvvələr – 34%
- Səbəb Ümumrusiya Azərbaycan Konqresinin sənədlərinin qaydasında olmamasıdır – 9%.
“Rusiyanın Dağlıq Qarabağ münaqişəsinin həllindəki vasitəçiliyini necə qiymətləndirirsiniz” sualına cavab verənlərin mütləq əksəriyyəti (93%) Moskvanın təkbaşına vasitəçiliyini Dağlıq Qarabağ münaqişəsinin həllini sürətləndirməyəcəyini, əksinə, işğalın davamına şərait yaratdığını bildiriblər. Sorğuya qatılanların yalnız 5%-i Rusiyanın münaqişənin həllinə çalışdığını, 2%-i isə bu haqda bir fikirlərinin olmadığını deyiblər.
Sorğunun dördüncü sualı belə olub: “Azərbaycanın Rusiyanın təkbaşına vasitəçiliyindən imtina etməlidirmi?” Cavablar:
- Bəli, imtina etməlidir – 78%,
- Xeyr, imtina etməməlidir – 12%,
- İmtina etməməli, ancaq digər iki həmsədr – ABŞ və Fransanın da prosesdə iştirakına çalışmalıdır” – 10%.
Sonuncu “Rusiya ilə münasibətlərin gərginləşməsi fonunda Azərbaycan xarici siyasətdə və təhlükəsizliyinin gücləndirilməsində hansı alternativlərə üstünlük verməlidir” – sualında respondentlərə aşağıdakı cavab variantları təqdim olunub və nəticələr belə bölünüb:
- Türkiyə ilə yeni hərbi əməkdaşlıq sazişi imzalanmalı, Türkiyənin Azərbaycanda, o cümlədən Naxçıvanda hərbi bazasının və ya hərbi təlim mərkəzinin yaradılması məqsədilə Ankara ilə danışıqlara başlanmalıdır” – 53 %
- NATO ilə hərbi əməkdaşlıq genişləndirilməlidir – 24 %
- Avropa İttifaqı ilə inteqrasiya sürətləndirilməlidir – 14 %
- Alternativlərə ehtiyac yoxdur, Rusiya ilə strateji tərəfdaşlığa davam edilməlidir – 9%.
