ABŞ casusları İrəvanı mühasirəyə aldı: - şok plan və düşmənə BÖYÜK TƏLƏ - Adlar/FOTOFAKT
Bir neçə ay öncəyə qədər rusların Cənubi Qafqazda forpostu olan Ermənistan “rəngli inqilab” nəticəsində siyasi oriyentasiyasını dəyişdi. Yeni baş nazir Nikol Paşinyan Moskvaya xoş gəlmək üçün nə qədər ruspərəst açıqlamalar versə də, Kreml də daxil olmaqla hər kəs bunun qeyri-səmimi olduğunu və İrəvanın artıq Vaşinqtonun nəzarətində olan bir ölkəyə çevrildiyini yaxşı anlayır. Ermənistandakı inqilabın sosial vəziyyətdən qaynaqlandığı məlumdur, lakin o da məlumdur ki, bir ölkədə inqilabın yetişməsi hələ onun baş verməsi demək deyil. Partlayışın baş verməsi üçün kənar təkan vacibdir və ermənilər də məhz bu təkan sayəsində köhnə rejimdən xilas ola bildi. Maraqlıdır, Amerika rusların qulağının dibində, regionda ən böyük rus təsirinin olduğu ölkədə necə inqilab etdi?
Publika.az xarici mediada yayılan informasiyalara əsasən bunu araşdırıb.
İlk diqqət çəkən məqam ABŞ-ın Avropada ən böyük diplomatik korpusunun məhz Ermənistanda olmasıdır. Kiçik ölkədə bu qədər diplomatın olması təsadüfdürmü? Ermənistan Xarici İşlər Nazirliyinin rəsmi saytında yer alan məlumata görə, ölkədə həyat yoldaşları ilə birlikdə 84 amerikalı diplomat var, lakin onların sayının daha çox olduğu təxmin edilir. Diplomatik mənbələr amerikalıların bir çoxunun Ermənistanda öz missiyalarından kənar fəaliyyət göstərdiyini deyirlər.
ABŞ-ın Qafqaz siyasətini araşdıran “Elminber” saytı Ermənistanda bu qədər amerikalı diplomatın olmasını təsadüfi hesab etmir.
Rusiyanın “Maksalexandrov.liverjournal.com” saytı isə amerikalı diplomatların əslində Ermənistanda casus fəaliyyəti göstərdiyini yazır. ABŞ-ın Ermənistandakı səfirliyi bu informasiyanı təkzib edir, lakin şübhəli suallar cavabsız olaraq qalmaqdadır.
ABŞ casusları İrəvanı mühasirəyə aldı:
Mənbələr danışır ki, İrəvandakı amerikalı diplomatlar nazirliklərdən tutmuş, müxalifət partiyalarına, mediadan tutmuş, vətəndaş cəmiyyəti institutlarına qədər sızıb.
Məlumatlara görə, ABŞ-ın Ermənistandakı casus şəbəkəsinin başında iki şəxs dayanır: 1: Səfir Riçard Mills. 2: ABŞ Beynəlxalq İnkişaf Agentliyinin (USAİD) Ermənistan üzrə nümayəndəsi Debroah Grieser.
Riçard Mills Barak Obama dövründə vəzifəyə gəlib, daha sonra ABŞ Dövlət Departamentinin postsovet masasında təmsil olunub, vaxtilə ABŞ-ın Rusiyanın Sankt-Peterburq şəhərindəki konsulluğunda işləyib. 2009-cu ildə İraqa “demokratiya üzrə məsləhətçi” olaraq gedib.
Mənbələr İrəvanda diplomat sifəti ilə təmsil olunan ABŞ kəşfiyyatçılarının adlarını da açıqlayır:
1. Makkesova Sova: O, ABŞ-ın İrəvandakı səfirliyində “baş katib” olaraq çalışır, əslində isə CİA-nın (ABŞ Mərkəzi Kəşfiyyat İdarəsinin) İrəvandakı ən yüksək səviyyəli təmsilçisi olduğu deyilir.
2. Nikolos Sepaşvili: Makkesova Sova ilə evlidir. Ukrayna üzrə mütəxəssis hesab olunur.
3. Bradli Filpot: İrəvandakı ABŞ səfirliyində attaşe olaraq işləyir. 1980-ci il təvəllüdlüdür. Gürcüstan üzrə mütəxəssis olaraq tanınır. İrəvandakı vəzifəyə M.Sova tərəfindən gətirilib.
4. Riçard Hatc: “Rəngli inqilab” üzrə mütəxəssisdir. İkinci katibdir, Jose Larziball və Adam Colvinlə birlikdə Ermənistan mediası üzərində çalışır. Hər üç şəxs M.Sovaya bağlıdır və Açıq Cəmiyyət İnstitu (Soros Fondu) ilə birlikdə hərəkət edirlər.
5. Polkovnik Brays Murfi: Daha əvvəl Kosovoda olub, oradan İrəvana gəlib. Hərbi attaşe olaraq çalışır. ABŞ Milli Kəşfiyyat İdarəsinin üzvüdür.
6. Mayor Erik Larsen: Ermənistanda “Təhdidləri azaltma koordinatoru” olaraq bioloji proqram üzərində işləyir. Mənbələr vaxtilə Corc Marşal adına Avropa Təhlükəsizlik Mərkəzində işləyən Larsenin Ukrayna, Moldova və Azərbaycanda da çalışdığını deyir.
7. Maykl Andreys Bashan: USAİD-in saytında adı hallanır, lakin daha çox hərbi çevrilişlərdə iştirak etdiyi və bu istiqamət üzrə mütəxəssis olduğu iddia edilir.
8. Lila Bashan: Maykl Bashanla evlidir. 2008-ci ildə “The New York Times” qəzetinin yazdığı məlumatda Lila Bashan “münaqişələrin qarşısını alma” üzrə ABŞ Dövlət Departamentinin yenidənqurma və inkişaf şöbəsində işlədiyi deyilirdi. Həmin məlumatda o da qeyd olunurdu ki, L.Bashan 2000-2008-ci illərdə Qərbi Afrikada koordinator olaraq çalışıb. Ermənistan XİN-in saytında Lilanın ABŞ səfirliyində ikinci katib olaraq işlədiyi qeyd olunur.
9. Cosua Mulford: Bu şəxsin rəsmi vəzifəsi “hərbi attaşe köməkçisi” olaraq göstərilir. Lakin Mulfordun polkovnik Brays Murfiyə bağlı şəxs olduğu deyilir.
Bu informasiyalar Ermənistandakı inqilabı Paşinyanın yox, ABŞ casuslarının etdiyini deməyə əsas verir. Digər tərəfdən, Rusiya sərhədində - xüsusilə Ermənistanda bu qədər ABŞ kəşfiyyatçısının olması Vaşinqtonun gələcəklə bağlı böyük planlarının olduğunu göstərir.
