Xaricdən gətirilən hibrid avtomobillərin dəyəri 2 dəfə artıb – Rəsmi
Bu ilin yanvar-noyabr aylarında Azərbaycana xaricdən 66 min 866 ədəd müxtəlif təyinatlı avtomobil idxal olunub.
Yeniavaz.com Dövlət Gömrük Komitəsindən açıqlanan məlumatlara istinadən apardığı hesablama göstərir ki, ölkəyə gətirilən avtomobillərin ümumi gömrük dəyəri 932 milyon 95,4 min dollar olub. Nəticədə ölkəyə idxal olunan bir ədəd avtomobilin orta gömrük dəyəri 13 min 940 dollar (23 min 697 manat) olub.
Yanvar-noyabr ayları ərzində Azərbaycana 61 min 637 ədəd minik avtomobili, 374 ədəd sürücü daxil olmaqla 10 nəfər və ya daha çox adam daşımaq üçün nəzərdə tutulmuş motorlu nəqliyyat vasitəsi, 4 min 556 ədəd yük daşımaq üçün motorlu nəqliyyat vasitəsi, 299 ədəd xüsusi təyinatlı motorlu nəqliyyat vasitəsi idxal olunub.
Bundan başqa xaricdən 10 min 483 ədəd daxili yanma mühərriklə yanaşı elektrik mühərriklə də hərəkətə gətirilən nəqliyyat vasitəsi (hibrid), 409 ədəd yalnız elektrik mühərriklə hərəkətə gətirilən nəqliyyat vasitəsi gətirilib.
Hibrid avtomobillərin 1 ədədinin orta gömrük dəyəri 12 min 840 dollar (21 min 828 manat) olub. Yalnız elektrik mühərriklə hərəkətə gətirilən 1 ədəd nəqliyyat vasitəsinin orta gömrük dəyəri isə 35 min 25 dollar (59 min 544 manat) olub.
Məlumat üçün bildirək ki, ötən ilin analoji dövrü ilə müqayisdə avtomobillərin idxalı azalıb. Belə ki, ötən ilin yanvar-noyabr aylarında Azərbaycana xaricdən 81 min 726 ədəd müxtəlif təyinatlı avtomobil idxal edilib. İdxal olunan bir ədəd avtomobilin orta gömrük dəyəri isə artıb. Ötən ilin ilk 11 ayında xaricdən gətirilən avtomobillərin gömrük dəyəri builkindən 26,7% az - 10 min 221 dollar (17 min 377 manat) olub.
Diqqət çəkən məqamlardan biri də idxal olunan hibrid avtomobillərin dəyərinin kəskin artmasıdır. Qeyd edək ki, ötən ilin ilk 11 ayında hibrid avtomobillərin dəyəri builkindən təxminən 2 dəfə aşağı - 6 min 82 dollar olub.
