Xırdalanda ölən qızlar dəm qazından zəhərlənməyib - İDDİA
Abşeron rayonunun Xırdalan şəhərində baş verən dəhşətli hadisədə ölən qızların dəm qazından boğulmadığı iddia olunub.
Gundeminfo.az xəbər verir ki, a24.az-a açıqlama verən 1 saylı mənzil kommunal təsərrüfatı birliyinin sədri İmamverdi Sadıqov bildirib ki, bu barədə məlumat daxil olan kimi əraziyə gəliblər və dərhal şüşəni sındıraraq bir nəfər gənci içəri salıblar.
"Həmin uşaq qapını açdı və içəri girdik. 3 nəfər qadın yerdə uzanmışdı, birinin meyiti isə onların üzərində idi. Bir qadın isə digər otaqda tək idi və orada ölmüşdü. Dərhal əraziyə polis və təcili yardımı çağırdım. Evdə heç bir qaz iyi yox idi və qaz sobası da yanmırdı. Mənzilin çölündən də qaz bağlı idi. Hadisədən də qohumlarından biri xəbər tutub. Belə ki, o, dəfələrlə telefona zəng vurub cavab almadıqda evə gəlib və qapının bağlı olduğunu görüb. Bundan sonra ev sahibindən icazə alındı və mənzilə daxil olduq”.
Qonşular isə iddia edirlər ki, onlar dəm qazından zəhərlənərək ölüblər.
