Keçmiş səfir Əliyar Səfərli vəfat edib
AMEA-nın müxbir üzvü, filologiya elmləri doktoru, professor Əliyar Səfərli vəfat edib. APA-nın məlumatına görə, Ə. Səfərli 80 yaşında ürək tutmasından dünyasını dəyişib.
AMEA-nın Əlyazmalar İntitutunun direktoru Teymur Kərimli APA-ya deyib ki, Əliyar Səfərli bu gün Masazır qəbiristanlığında torpağa tapşırılacaq.
Qeyd edək ki, Ə. Səfərli Əliyar Səfərli 1937-ci ildə Ordubad rayonunun Anabad kəndində anadan olub. 1955-ci ildə orta məktəbi, 1960-cı ildə Azərbaycan Dövlət Universitetinin Şərqşünaslıq fakultəsinin İran filologiyası şöbəsini bitirib, 1960-1968-ci illərdə Azərbaycan Elmlər Akademiyasının Nizami adına Ədəbiyyat İnstitutunun elmi işçisi olub. Uzun müddət BDU-nun Filologiya fakultəsində tədrislə məşğul olub, 1986-1994-cü illərdə Azərbaycan ədəbiyyatı tarixi kafedrasının müdiri işləyib.
Məsihinin (17-ci əsr) həyat və yaradıcılığına, 17-18-ci əsrlər Azərbaycan epik şerinə dair tədqiqatların müəllifidir. Bir sıra unudulmuş ədəbi abidələri aşkara çıxarıb, ilk anadilli poema olan "Dastani Əhməd Hərami"ni, Qazi Bürhanəddinin "Divan"ını, Məhəmməd Füzulinin "Həqiqət üs-süəda" əsərini (şərikli), Məsihinin "Vərqa və Gülşa" poemasını, "Şəhriyar" dastanını, habelə Nəsimi, Əmani və başqalarının əsərlərini tərtib və nəşr etdirib. Uzun illər Azərbaycan Təhsil Nazirliyində "Ədəbiyyatşünaslıq" bölməsinin rəhbəri olub, orta və ali məktəblər üçün dərslik, dərs vəsaiti və proqramların hazırlanmasında bilavasitə yaxından iştirak edib. Əsərləri xarici ölkələrdə nəşr edilib.
Əliyar Səfərli diplomatik sahədə də fəaliyyət göstərib. 1994-1998-ci illərdə Azərbaycan Respublikasının İran İslam Respublikasında fövqəladə və səlahiyyətli səfiri olub.
