ABŞ neft ixracatına qadağanı rəsmən götürdü - qiymətlər enməkdə davam edəcək

ABŞ neft ixracatına qadağanı rəsmən götürdü -


ABŞ Konqresinin liderləri 2016-cı il büdcə xərcləri üzrə razılığa gəliblər. Bu razılıq çərçivəsində dövlət aparatının işinə yaranmış təhlükə aradan qalxacaq və neft ixracına qoyulmuş qadağa ləğv ediləcək.

APA-nın “Bloomberg”ə istinadən verdiyi məlumata görə, Nümayəndələr Palatasının sədri, respublikaçı Pol Rayan bağlı qapılar arxasında keçirilən müşavirədə bu barədə razılıq əldə olunduğunu açıqlayıb. O bildirib ki, dövlət xərcləri planının təsdiqlənməsi ilə bağlı səsvermə dekabrın 17-də keçiriləcək. Dövlət aparatının saxlanılması üçün 1,1 trilyon dollar ayrılacaq.

Viskonsin ştatından seçilmiş konqresmen Reyd Ribll müzakirə çərçivəsində 1975-ci ildə ABŞ xam neftinin ixracına qoyulmuş embarqonun ləğvi barədə razılığa gəldiklərini söyləyib. Bu məsələdə respublikaçılar israrlı olub. Onlar hesab edir ki, ixracın başlaması ABŞ iqtisadiyyatı üçün əlavə vəsaitlərin daxil olmasına və büdcənin balanslaşdırılmasına kömək edəcək. Texasdan seçilmiş konqresmen Co Barton qeyd edib ki, ABŞ ən yaxşı texnologiyalara, ən yaxşı neftə malikdir və Rusiya, Səudiyyə Ərəbistanı, İran kimi ölkələri neft bazarından sıxışdıracaq.

Qeyd edək ki, demokratlar və prezident Barak Obama neft ixracına qoyulmuş qadağanın ləğvinə qarşı çıxırdılar.

Hazırda ABŞ-ın strateji neft ehtiyatları 486 milyon barel təşkil edir. Orta sutkalıq hasilat 9 milyon bareldir. Hasilatın və ehtiyatların artmasına şist nefti mühüm təsir göstərib.



Twitter Facebook Myspace Stumbleupon Technorati blogger google
923 dəfə oxundu
 



XƏBƏR LENTİ
Loading...