Dərmanların qiyməti dəyişir
Dövlət Statistika Komitəsi mal və xidmətlərin qiymətləri ilə bağlı bu ilin 7 ayının statistik hesabatını açıqlayıb. Rəsmi göstəricilərə görə, yanvar-iyul ayında dərmanların qiyməti bir neçə faiz bahalaşıb. İqtisadçı Rövşən Ağayev deyir ki, ərzaq və qeyri-ərzaq malları içərisində bahalşmanın lideri məhz dərman vasitləridir. “Son 1 ildə dərmanların qiyməti 34 faiz, tibbi təyinatlı digər məhsullar isə 24 faiz bahalanıb. Tibbi sığorta sistemi çalışmadığından müalicə və sağlamlığın qorunması ilə bağlı xərclər ailə büdcəsində kifayət qədər yüksəkdir”,-deyə iqtisadçı əlavə edib.
Qeyd edək ki, Tarif Şurasının qərarı indiyədək 9850 adda dərmanın qiyməti tənzimlənib. Şuranın sonuncu iclası avqustun 4-də olub və 219 dərman vasitəsinin qiyməti təsdiqlənib. 7347 dərman vasitəsi təsdiq edilmiş qiymətlərlə artıq satışdadır, digər 2503 dərman vasitəsinin yeni qiymətləri isə bu ilin sentyabr ayının 1-dən qüvvəyə minəcək.
Beləliklə, sentyabrın 1-dən qiymətləri təsdiq edilməyən dövlət qeydiyyatına alınmış dərman vasitələrinin satışı yalnız həmin dərmanların qiymətləri təsdiq olunduqdan sonra həyata keçirilə bilər. Tarif Şurasının açıqlamasına görə, idxal dəyəri ilə ifadədə 44 faiz dərman vasitəsinin qiyməti 2 dəfədən çox, 25 faizinin qiyməti 3 dəfədən çox endirilib.
