Lukaşenko ATƏT-i qınadı
Belarus prezidenti Aleksandr Lukaşenko ATƏT-in Avropa regionundakı münaqişələrə göz yummalı olmadığını bəyan edib. Belarus lideri ATƏT-ə üzv dövlətləri təhlükəsizliklə bağlı mövcud problemlərin müzakirəsi üçün görüş keçirməyə səsləyib.
“Burada, bizim ümumi evdə, nizamlanması vacib olan çoxsaylı problemlər yığılıb – Dağlıq Qarabağ, Dnestryanı... Ukrayna da əlavə olunub və artıq kifayət qədər ciddi münaqişədir, onu çoxları müharibə adlandırır.
Bu məsələlərə zəif reaksiya göstərilməsinə görə, tez-tez ATƏT-i tənqid atəşinə tuturam, halbuki bu, bilavasitə ATƏT-in görməli olduğu işdir. ATƏT ilk növbədə Avropa qitəsində təhlükəsizliyə cavab verir axı... Bu problemlərə heç bir halda göz yummaq olmaz”, - deyə Lukaşenko Minskdə ATƏT parlament assambleyasının sədri Georgi Sereteli ilə keçirdiyi görüşdə bildirib.
Belarus prezidenti ATƏT-ə üzv dövlətlərin başçılarının uzun müddət bir araya gəlib, regionun problemlərini müzakirə etməməsini pisləyib.
“İstanbul sammitindən sonra (1999-cu il - red.) dövlət başçılarının irimiqyaslı toplantısı keçirilməyib. Ancaq lazım idi. Bir araya gəlib, problemləri həll etmək lazımdır. Həll yolu tapmaq mümkün olmasa belə, hansısa yolları və ya perspektivləri axtarmaq lazımdır”, - deyə Lukaşenko vurğulayıb.
