"Yeni parlamentlə əməkdaşlıq edəcəyik" Avropa İttifaqından seçki bəyanatı
Avropa İttifaqı Azərbaycanda keçirilmiş parlament seçkisi barədə ilkin bəyanat yayıb. Bəyanatda deyilir ki, 2015-ci il, noyabrın 1-də Azərbaycanda keçirilmiş parlament seçkisində seçki müşahidəçilərinin sayı barədə Azərbaycan hakimiyyət orqanları ilə ATƏT/DTİHB (Demokratik Təsisatlar və İnsan Haqları Bürosu) arasında razılıq əldə olunmadığndan təşkilat seçkiyə öz müşahidə missiyasını göndərməməyə məcbur olub, lakin seçkilərə Avropa Şurası Parlament Assambleyasının Seçki Müşahidəsi Missiyası göndərilib.
Bununla belə, Avropa İttifaqı Azərbaycanı ATƏT/DTİHB-in bundan əvvəlki tövsiyələrini icra etməyə çağırıb. “Avropa İttifaqı beynəlxalq standartlara uyğun, şəffaf və bütün tərəflərin iştirakını təmin edən seçkiləri dəstəkləyir. Dünənki seçkidə bir əsas müxalifət partiyası iştirak etməyib, çünki belə qərara gəlib ki, bütün namizədlər üçün eyni səviyyədə rəqabət meydanı təmin edilməyib” - deyə bəyanatda bildirilir. Avropa İttufaqının bəyanatında bildirilir ki, təşkilat bütün vətəndaşların xeyri naminə yeni seçilmiş parlament də daxil olmaqla Azərbaycanın təsisatları ilə əməkdaşlığı davam etdirmək niyyətindədir.
