Paşinyan: Qəti qənaətə gəlmişəm ki, Qarabağ hərəkatını davam etdirməməliyik
APA xəbər verir ki, bunu Ermənistanın Baş naziri Nikol Paşinyan Ermənistanın müstəqilliyi haqqında Bəyannamənin qəbul olunmasının 35-ci ildönümü ilə bağlı xalqa müraciətində deyib.
Paşinyan Ermənistanın müstəqilliyinin saxlanması və reallaşdırılması strategiyası seçdiklərini vurğulayıb: “Bu strategiya “Real Ermənistan”dır. Bu strategiya artıq ideologiyaya çevrilib. Məhz həmin ideologiya çərçivəsində Ermənistanla Azərbaycan arasında sülh yolu ilə nizamlanma, Türkiyə ilə həqiqi dialoq mümkün olub, Gürcüstan və İran İslam Respublikası ilə əlaqələrimiz dərinləşməlidir. Bu şəraitdə biz dünya üçün real və maraqlı tərəfdaşa çevrilirik”.
Baş nazir bildirib ki, beynəlxalq səviyyədə tanınmış 29743 kv/km ərazisi olan Ermənistan Respublikası beş əsrdən artıqdır ki, sahib olmadıqları ən mühüm dəyərdir.
“Biz dövlətimizin maraqlarını rəhbər tutmalıyıq. Dövlət və onun maraqları bizim vətənpərvərliyimizin əsası və özəyi olmalıdır”, - deyə o qeyd edib.
Paşinyan deyib ki, Ermənistan cəhənnəm sınaqlarından keçərək, inanılmaz görünən bir mərhələyə çatıb: “Bu gün Ermənistan Respublikası həmişəkindən daha müstəqildir, daha suverendir, həmişəkindən daha çox dövlət kimidir, həmişəkindən daha çox çiçəklənir, həmişəkindən daha perspektivlidir, çünki o, sülhsevərdir. Sülh bərqərar olub və o sülh institutlaşdırılmalıdır”.
Baş nazir 2025-ci ilin avqustunun Ermənistan Respublikası üçün dinc və firavan həyatın başlanğıcı olduğunu da əlavə edib.
Qeyd edək ki, Ermənistan SSR Ali Soveti Ermənistanın müstəqilliyi haqqında Bəyannaməni 23 avqust 1990-cı ildə qəbul edib.
