Əli Abbasov Azərbaycanın narahatlığını Fransaya çatdırdı
Azərbaycanın rabitə və yüksək texnologiyalar naziri Əli Abbasov Fransanın Xarici İşlər və Beynəlxalq İnkişaf Nazirliyi yanında xarici ticarət, turizmin inkişafı üzrə dövlət katibi Matias Fekla ilə görüşü zamanı Fransanın bir neçə şəhəri ilə qondarma "Dağlıq Qarabağ Respublikası"nın bir neçə şəhəri arasında "Dostluq və qardaşlaşma Xartiya"sının imzalanmasına etirazını bildirib.
"APA-Economics" xəbər verir ki, Ə. Abbasov Fransa rəsmisinə imzalanan "sənəd"lə bağlı Azərbaycan tərəfinin narahatlığını çatdırıb. "Bu məsələ ilə bağlı biz Fransanın rəsmi mövqeyini bilmək istəyirik", - deyə Ə. Abbasov qeyd edib. M. Fekla isə baş vermiş hadisənin bir daha təkrarlanmamasına çalışacaqlarını bildirib: "Fransanın Xarici və Daxili İşlər nazirlikləri bütün yerli İcra Hakimiyyəti orqanlarına rəsmi məktub göndərib. Həmin məktublarda sənədlərin qeyri-qanuni olduğu bildirilib. Bundan başqa, Fransa hökumətinin rəsmi mövqeyi də bütün icra hakimiyyəti orqanlarına çatdırılıb".
Qeyd edək ki, bu ilin may ayında Fransanın üç şəhəri ilə qondarma “Dağlıq Qarabağ Respublikası”nın üç şəhəri arasında "dostluq və qardaşlaşma xartiyası" imzalanıb.
1356 dəfə oxundu