Deputat: Azərbaycanın 22 muzeyi işğal altındadır
Bu gün Azərbaycanda 200 muzey var, onların 22-si işğal altındadır.
Trend-in məlumatına görə, bunu Milli Məclisin Mədəniyyət komitəsinin sədri Rafael Hüseynov komitənin bu gün keçirilən iclasında deyib.
R.Hüseynovun sözlərinə görə, həmin muzeylərdəki eksponatlar oğurlanaraq satılıb, bir çox xalçalar "erməni xalçası" adı ilə satışa çıxarılıb.
Komitə sədri qeyd edib ki, ermənilərin Azərbaycan mədəni irsinə qarşı “qəsd” etmələri həmişə olub və hazırda da var. O hesab edir ki, bunun qarşısını olmaqdan ötrü işlər görülməlidir:
"Novruz bayramı günlərində Avropa Şurası Parlament Assambleyasının komitələrinin növbəti iclası keçirilirdi. Həmin komitələrdən birinin iclasında mədəni irsin qorunması, onun məhv edilməsinin qarşısının alınması ilə bağlı məruzə müzakirə olunurdu. Məruzəni hazırlayan şəxs də Azərbaycanı tanıyan, bura gəlib-gedən şəxs idi. Məruzənin müzakirəsi zamanı o, çıxış edərək bildirdi ki, mədəni irs bəşəriyyətə məxsusdur, insanlığa aiddir. Mən isə əlavə etdim ki, ilk növbədə, AŞ PA-ya üzv olan Avropa ölkələrində bu sahədəki vəziyyəti düşünməliyik. Məsələn, Avropada ən qədim yaşayış məskəni Azıx mağarasıdır. Bu, təsdiqlənmiş faktdır. Ancaq bu gün həmin mağara işğal altındadır, erməni təcavüzünə məruz qalıb, dağıdılıb. Eyni zamanda, qeyd etdim ki, bu gün Azərbaycandakı 200 muzeyin 22-si işğal altındadır. Onların eksponatları oğurlanıb, məhv edilib, satışa çıxarılıb. Bildirdim ki, bu faktlar da məruzədə öz əksini tapmalıdır. Mənim fikirlərim Türkiyə, Ukrayna və Böyük Britaniyadan olan deputatlar tərəfindən də dəstəkləndi, onlar məni müdafiə etdilər. Çox sevindirici haldır ki, fikirlərim, təkliflərim həmin məruzədə də öz əksini tapacaq".
