Təbrizdə Ermənistan konsulluğu açılır
Yeniavaz.com xəbər verir ki, bu barədə Türkiyənin “Yeni şafak” nəşri məlumat yayıb.
Bildirilib ki, bu barədə qərar dekabrın 27-də İran və Ermənistan xarici işlər nazirlərinin görüşü zamanı razılaşdırılıb.
“İranın xarici işlər naziri Hüseyn Əmir Abdullahian yanvarın ilk həftələrini Ermənistan konsulluğunun açılış tarixi kimi qeyd edib.
İran Xarici İşlər Nazirliyinin sözçüsü Nəsir Kənani yanvarın 1-də konsulluğun açılması ilə bağlı açıqlama verərkən, Ermənistan və İran arasında əvvəllər imzalanmış ikitərəfli sazişlərin olduğunu vurğulayıb”, - məlumatda deyilir.
Qeyd olunur ki, İran xarici işlər naziri və xarici işlər nazirinin sözçünün Təbrizdə Ermənistan konsulluğunun açılması barədə açıqlamalarından sonra İranın Ermənistandakı səfiri Mehdi Sübhani də açıqlama verib:
“Ermənistan dövlət televiziyasına danışan İran rəsmisi bildirib ki, Ermənistan İranın Kapandakı konsulluğundan sonra Təbrizdə baş konsulluq açacaq ki, bu da iki ölkə arasında sərhəd əlaqələrini gücləndirəcək.
Qarşılıqlı konsulluqların açılması ilə bağlı qərar 2021-ci ilin dekabrında hər iki tərəfin xarici işlər nazirlərinin iştirakı ilə keçirilən sammitdə qəbul edilib. Konsulluqların açılması ilə bağlı ilk addım İrandan gəlib. Belə ki, 2022-ci ilin oktyabrında İran Ermənistanın Azərbaycanla sərhəddə yerləşən Kapan şəhərində konsulluq açıb”.
“Kapan və Təbriz şəhərlərinin iki ölkə üçün qarşılıqlı konsulluq fəaliyyəti kimi seçilməsi türk dünyasına qarşı mesaj kimi şərh edilib. Məlum olduğu kimi, Tehran rəhbərliyi uzun illər Təbrizdə Azərbaycanın analoji tələblərinə cavab verməyib və Təbrizdə Azərbaycan konsulluğunun açılması illərlə davam edən bürokratik təşəbbüslərdən sonra mümkün olub. Əhalisinin əksəriyyəti azərbaycanlılar olan Təbriz şəhərində baş konsulluğun açılmasının regionda gərginliyi artırması da istisna deyil”, - nəşr yazır.
