“Rasim Əliyev döyülərək öldürülüb“ ekspertiza rəy verdi
Məhkəmə-tibbi ekspertiza jurnalist Rasim Əliyevin döyülmə nəticəsində öldüyünü təsdiqləyib.
GUNDEMİNFO.AZ-ın "Trend"ə istinadən məlumatına görə, bu barədə Səhiyyə Nazirliyinin Məhkəmə-Tibbi Ekspertiza və Patoloji Anatomiya Birliyinin baş direktoru, professor Şakir Musayev məlumat verib.
Ş.Musayev qeyd edib: "Mərhumun üzərində çoxsaylı xəsarətlər olub. Onlar yüksək travmalar, ağır xəsarətlər olub”. O bildirib ki, ekspertiza iki mərhələli aparılıb: "Ekspertiza zamanı həm meyitin ekspertizası aparılıb, həm də mərhuma göstərilən tibbi yardım araşdırılıb. Mərhuma tibbi yardımın göstərilməsi ilə bağlı araşdırma Səhiyyə Nazirliyinin yüksək ixtisaslı mütəxəssislərindən ibarət xüsusi komissiyası tərəfindən aparılıb".
Ş.Musayev deyib ki, artıq məhkəmə-tibbi ekspertizanın nəticələri hüquq-mühafizə orqanlarına təqdim edilib: "İstintaq sirri olduğundan ekspertizanın nəticələri tam olaraq açıqlanmır".
