Virusla bağlı kritik məqam: - “Azərbaycanda ilk dalğa hələ bitməyib”
Yoluxma və ölüm hallarının ən ciddi artımı Ankaradadır. Türkiyənin Səhiyyə naziri Fəxrəddin Qoca da yeni növ koronavirusla (COVID-19) mübarizə tədbirlərilə bağlı yaradılan Elm Qurumunun növbəti toplantısında epidemioloji durumun pisləşməsi ilə bağlı narahatlığını ifadə edib. Nazir deyib ki, ölkə boyu COVID-19 infeksiyasının yayılması nəzarətdədir və Türkiyə birinci dalğanın 2-ci zirvəsindədir. F.Qoca vurğulayıb ki, indiyədək 29 min 865 səhiyyə işçisi COVID-19 infeksiyasına yoluxub, 52 səhiyyə işçisi isə bu virusdan həyatını itirib.
Maraqlıdır, Azərbaycanda infeksiyanın yayılması hansı mərhələdədir?
Tibb elmləri doktoru, professor Adil Qeybulla Cebhe.info-ya bildirib ki, Azərbaycan hələlik koronavirusun birinci dalğasını yekunlaşdıra bilməyib:
“Türkiyədə epidemioloji vəziyyətin pisləşməsi həqiqətən qeyd olunur. Bunu artıq başqa ölkələr də bildirirlər. Nazirin açıqlaması da təsadüfi deyil. O ki qaldı, dalğa məsələsinə, Azərbaycan hələ birinci dalğanı yekunlaşdıra bilməyib. Çünki bizdə may ayından sonra reyinfeksiya oldu, birinci dalğa bitmədi, əksinə pik səviyyəsinə çatdı. Düşünürəm ki, biz birinci dalğanın eniş xəttindəyik. Əgər yenidən reyinfeksiya, alovlanma və ya başqa hadisə olmasa, bu yavaş-yavaş enməyə doğru gedəcək. Yenidən reyinfeksiya və ya alovlanma olarsa, təbii ki, bu Türkiyə variantına gəlib çıxa bilər”.
