Elşad Hacıyev: Xocalıda yetişdirilən narkotikin 1 kq-nın “qara bazar” qiyməti 8-10 min manat arasında dəyişir
APA-nın Xocalıya ezam olunmuş əməkdaşı xəbər verir ki, bu barədə Daxili İşlər Nazirliyinin (DİN) Mətbuat xidmətinin rəisi Elşad Hacıyev jurnalistlərə açıqlamasında deyib.
Onun sözlərinə görə, mütəxəssis araşdırması onu deməyə əsas verir ki, bu ərazilərdə narkotik vasitələrin yetişdirilməsi işi aparılıb, xüsusilə çətənə bitkisinin kultivasiya yolu ilə əkilib becərilməsi işi təşkil olunub: “Bilirsiniz ki, bununla bağlı Azərbaycan hökuməti beynəlxalq təşkilatlar qarşısında, ayrı-ayrı tədbirlərdə məsələ qaldırırdı ki, işğal altında olan ərazilərdə narkotik vasitələrin geniş kultivasiya yolu ilə əkilib becərilməsi və tranziti halları var. Lakin Ermənistan hakimiyyəti bunun ehtimal olduğunu irəli sürür və bunu iddia hesab edirdi. Amma bu gün burada plantasiyanın olması onu deməyə əsas verir ki, işğal dövründə, yəni 30 il ərzində bu ərazilərimizdə narkotiklərin əkilib becərilməsi işi geniş şəkildə təşkil edilib. Bu çətənə bitkisi narkotik maddələrin emal prosesində xammal hesab olunur. Qurudulduqdan sonra marixuana olsa da, zənginləşdirilmiş formada digər psixotrop tərkibli maddələrin hazırlanmasında istifadə edilir”.
DİN rəsmisi əlavə edib ki, 44 günlük Vətən müharibəsindən sonra digər azad edilmiş ərazilərimizdə də narkotik vasitələrlə əlaqəli hallar aşkarlanıb, orda da müxtəlif yerlərdə marixuana, xaş-xaş və digər narkotik vasitələrin əkilməsi hallar müəyyən edilib: “Bunlar əsasən, erməni silahlı birləşmələrinin qanunsuz yerləşdiyi ərazilərdə idi. Beləliklə, bu iş onların nəzarəti altında həyata keçirilirdi. İşğaldan azad edilmiş əsas rayonlarda, Cəbrayıl, Füzuli və Zəngilanda belə hallar aşkarlanıb. Daha çox hərbi hissələrdə xidmət edən şəxslərin istifadəsində olan həmin qablaşdırılmış narkotik vasitələr idi. Bu gün bütün dünya görsün ki, bu yer bir faktdır. Digər yerlərdə də belə halların olması istisna edilmir. Həmin ərazilərdə hazırlanan narkotik vasitələr tranzit imkanlarından istifadə edilməklə müxtəlif ölkələrə göndərilib.
Ərazidə digər kimyəvi maddələr əlavə edilməklə başqa tərkibli psixotrop maddələr hazırlanan emalatxana, laboratoriyaların olması istisna edilmir. Bunun üçün Daxili İşlər Nazirliyinin əməkdaşları tərəfindən kompleks tədbirlər görülür ki, bəşəriyyət üçün təhlükəli olan belə halların qarşısı alınsın”.
Elşad Hacıyev qeyd edib ki, anti-terror tədbirləri keçirilənə qədər buradakı çətənə kollarına ciddi şəkildə qulluq edilib: “Mütəxəssislər hesab edirlər ki, bu narkotik vasitənin “sativa” növüdür. Bu da dünya bazarında daha çox tələbat olan məhsuldur. "Qara bazar"da onun 1 kiloqramının qiyməti 8-10 min manat arasında dəyişir. Bunun zənginləşdirilərək başqa maddələrə çevrilməsi halında isə qiymətlər fərqli olur. Ona görə, bu gün aparılan işlərin əsas məqsədi ona yönəlib ki, kriminal rejimdən geriyə qalan cinayət yuvaları tamamilə təmizlənsin”.
