Qazinin kreditini anasından tələb etmək nədir?
Gundeminfo.az Valyuta.az-a istinadən xəbər verir ki, bu barədə onun yaxınları məlumat verib.
Bildirilib ki, vəfatından bir müddət sonra ailə üzvləri onun "Bank of Baku”dan kredit götürdüyündən xəbərdar olub. Səbuhi Məmmədovun banka təxminən 1000-1200 manat borcu qalıb.
2 ilə yaxın vaxt keçəndən sonra Səbuhinin anasını banka çağırıblar və deyiblər ki, oğlunun krediti var idi, onu ödəməlisən: "Hətta, bank əməkdaşı bir qədər də kobud şəkildə əlavə edib: "Oğlunuzun borcunu ödəyin ki, o dünyada da onu inkir-minkir narahat eləməsin".
Qeyd edək ki, Mülki Məcəlləyə əsasən, fiziki şəxsin vəfatı ilə onun borc öhdəlikləri də avtomatik silinmir. Borclar mirasın tərkibinə daxildir. Yəni vəfat edən şəxsin adına olan əmlak, aktivlər, pul vəsaitləri, daşınmaz və daşınar əmlak varsa – həmin mirasdan kreditorların tələbi ödənilə bilər. Əgər vəfat edən şəxsdən miras qalmayıbsa (yəni onun adına heç bir əmlak, pul və ya aktiv yoxdursa), ailə üzvlərinin və ya qohumların bu borcu ödəmək öhdəliyi yoxdur. Yaxınlarının bildirdiyinə görə, Səbuhi Məmmədovun adına hər hansı əmlak və ya aktiv yoxdur. Ona görə də bankın bu şəkildə davranması əsassızdır.
Bununla belə, sözegedən məsələ ilə bağlı məsələ məhkəmədə həll ediləcək. İşə sentyabrın 1-də Şirvan şəhər Məhkəməsində hakim Əli İmanovun sədrliyi ilə baxılacaq.
Qeyd edək ki, Səbuhi Məmmədov "Report” informasiya agentliyinin əməkdaşı olub. O 44 günlük Vətən müharibəsində iştirakına görə, Prezident İlham Əliyevin iyunun 24-də imzaladığı sərəncamla "Xocavəndin azad olunmasına görə” medalı ilə təltif edilib. O, həmçinin Səfərbərlik və Hərbi Xidmətə Çağırış üzrə Dövlət Xidməti tərəfindən "Hərbi vətənpərvərlik tərbiyəsində xidmətlərə görə” medalı, Əmək və Əhalinin Sosial Müdafiəsi Nazirliyi tərəfindən "Təşəkkürnamə” ilə təltif edilib.
