Elçibəyin vəzifə, İlham Əliyevin medal verdiyi Sinan Oğan kimdir? – DOSYE
Pravda.az-ın məlumatına görə, 55 yaşlı Sinan Oğan seçki prosesindəki cari nəticələri ilə yanaşı, şəxsi həyatı və karyerası, eləcə də Azərbaycanla əlaqəsi ilə bağlı hazırda müzakirə olunur.
İlk olaraq qeyd etmək lazımdır ki, S.Oğan 1967-ci ildə Iğdırda azərbaycanlı ailəsində dünyaya gəlib. Marmara universitetində iqtisadiyyat və idarəetmə üzrə təhsil alan Sinan Oğan 1993-2000-ci illərdə Azərbaycanda müəllim olaraq fəaliyyət göstərib. Belə ki, onun Azərbaycan İqtisadiyyat universitetində müəllim fəaliyyəti ilə yanaşı, dekan müavini olaraq çalışması da məlumdur.
Prezidentliyə namizədin bu yaxınlarda verdiyi açıqlamaya görə, azərbaycanlı iki nazir onun tələbəsi olub. O bildirib ki, gənclər və idman naziri Fərid Qayıbov və iqtisadiyyat naziri Mikayıl Cabbarov onun tələbələri olub. 2000-ci ildə Türkiyəyə qayıdan Oğan Avrasiya Strateji Araşdırmalar Mərkəzində Qafqaz üzrə çalışıb.
Lakin Sinan Oğanın Azərbaycandakı fəaliyyəti bununla bitmir. Belə ki, 1991-ci ildə Sovet İttifaqının dağılmasından əvvəl Azərbaycanın mərhum prezidenti Əbülfəz Elçibəylə görüşüb və Azərbaycanın müstəqillik qazanmasından sonra bir müddət Elçibəyin Ofisində fəaliyyət göstərib.
O, eyni zamanda 1992-2000-ci illərdə TİKA-nın (Türk Əməkdaşlıq və Koordinasiya Agentliyi) Azərbaycandakı nümayəndəsi olaraq işləyib. 2011-ci ildə Azərbaycan Prezidenti İlham Əliyevin sərəncamı ilə “Tərəqqi medalı”na layiq görülüb. Oğan, həmçinin Türkiyə-Azərbaycan Parlamentlərarası Dostluq qrupunun baş katibi vəzifəsində də çalışıb.
Siyasi fəaliyyətinə gəldikdə isə, qeyd etmək lazımdır ki, Sinan Oğan 2011-ci ildə Milliyyətçi Hərəkat Partiyasının Iğdır bölgəsindən deputatlığa namizəd olub və seçkilərdə qalib gələrək deputat mandatı qazanıb. 2015-ci ildə MHP-ni tərk edən Oğan 2023-cü ildə “ATA” İttifaqından prezidentliyə namizəd olub.(Qafqazinfo)
