Azərbaycan qadınları Anna Akopyanı ittiham etdilər: “Sülhpərvər dona” bürünmüşdü”

Azərbaycan qadınları Anna Akopyanı  ittiham etdilər:

Qarabağ Azadlıq Təşkilatının (QAT) qadınları işğalçı Ermənistanın baş nazirinin arvadı Anna Akopyanın Dağlıq Qarabağ bölgəsinə gələrək növbəti dəfə qanunsuz hərbi təlimlərdə iştirak etməsinə və səngərdə uzanaraq avtomatla Azərbaycan mövqelərini nişan aldığını göstərən fotolarını yaymasına kəskin etiraz edərək bəyanat qəbul edib.

Modern.az-ın məlumatına görə, bəyanatda deyilir: “Ermənistanın 30 ildir Azərbaycanın ayrılmaz ərazisi Dağlıq Qarabağı işğal altında saxladığı, rəsmi İrəvanın dünya birliyinin "azad et!" tələbinə məhəl qoymadığı, Azərbaycanla cəbhə xəttində dəfələrlə təxribatlar törətdiyi, Tovuz istiqamətində Azərbaycanın ərazi bütövlüyünə növbəti cəhdi hər kəsə bəllidir.

Anna Akopyan Tovuz təxribatını, Paşinyanın başçılıq etdiyi hökumətin terrorçu hərəkətlərini unutdurmaq üçün "sülhpərvər dona" bürünərək Azərbaycan analarına müraciət etdi. 2018-ci ildə özünü regionda sülhün müdafiəçisi kimi təqdim edən və "Sülh uğrunda qadınlar” kampaniyasına azərbaycanlı qadınları da dəvət edən Anna Akopyanın qadınlarla Azərbaycan torpağı olan Dağlıq Qarabağda qanunsuz təlim keçməsi işğalçı Ermənistan dövlətinin ikiüzlü siyasətindən xəbər verir. Əgər Ermənistanda qadınlar da müharibəyə hazırlaşırlarsa, bu ölkənin sülh istəməsinə necə inanmaq olar?

Əlbətdə ki, erməni tərəfinin sülh istəməsi onların məkirli siyasətinə xidmət edir. Çünki bu müddət ərzində onlar işğalçılıq siyasətini daha da genişləndirir, xaricdə yaşayan erməni ailələrini Qarabağa yerləşdirərək özününküləşdirmə siyasətini sürələndirir, bir sözlə sülh və atəşkəs rejimindən çox məharətlə yararlanır. Sadəcə, dünya birliyinin bunlara bilərəkdən susması, Ermənistanın bütün sülh şərtlərini pozmalarına göz yumması, Azərbaycana ikili yanaşmaları açıq aydın özünü göstərir. Bu baxımdan dünya birliyini bu yanaşmaya son qoymağa çağırır və BMT-nin Təhlükəsizlik Şurasının və ATƏT-in qərarlarını yerinə yetirərək Ermənistanın işğalçı qüvvələrinin işğal olunmuş Azərbaycan ərazilərini dərhal tərk etmələrini tələb edirik”.

Twitter Facebook Myspace Stumbleupon Technorati blogger google
57 dəfə oxundu
 



XƏBƏR LENTİ
Loading...