“Azəristiliktəchizat”da ŞÜBHƏLİ TENDER OYUNBAZLIĞI... - İlginc iddialar

 “Azəristiliktəchizat”da ŞÜBHƏLİ TENDER OYUNBAZLIĞI... -

“Azəristiliktəchizat” Açıq Səhmdar Cəmiyyətinin sifarişçi olduğu satınalmaların qalibi olan şirkətlərin qanuni təmsilçilərinin müxalif mövqeli partiyalara yaxın şəxslər olmasının bir təsadüfürmü?..

Azərbaycanda dövlət maliyyəli qurumların sifarişçi olduqları satınalmalarda korrupsiya hallarının olması barədə dəfələrlə yazılıb.

Bir müddət öncə “Neuron Technologies” şirkətinin sahibi İsmayıl Ələkbərov dövlət qurumları tərəfindən elan edilən tenderlərin bir hissəsi yalnız nağdlaşdırma məqsədilə keçirildiyini bildirmişdi.

İş adamının sözlərinə görə Aərbaycanda elə dövlət qurumları var ki, sifarişçi olduqları tenderlərin 50%, bəzən isə hətta 70-80% «otkat» formasında geri alırlar. Qeyri-rəsmi olaraq “otkat” adlanan bu proses müxtəlif yollarla həyata keçirilir: ya sifarişi alan pulun müəyyən hissəsini əvvəlcədən ödəyir, ya pul hesabına oturduqdan sonra. “Otkat”ın əvəzində isə sifarişi alan tərəf qiymətləri istədiyi kimi müəyyənləşdirir, aşağı keyfiyyətli məhsuldan istifadə edib, baha qiymətə rəsmiləşdirir. Yeri gəlmişkən, tender qanunvericiliyinin posulması zəncirvari prosesə çevrilərək, digər sahələrdə də qanunsuzluqlara yol açır və görülən işlərin keyfiyyətinə çox ciddi təsir göstərir.

Maraqlı olan isə budur ki, çoxsaylı dövlət satınalmaları həyata keçirən dövlət maliyyəli qurumların bəzilərinin fəaliyyətləri çox zaman heç də qənaətbəxş olmur.

PİA.az-ın araşdırması zamanı məlum oldu ki, il ərzində çoxsaylı dövlət satınalmaları həyata keçirən qurumlardan biri də “Azəristiliktəchizat” Açıq Səhmdar Cəmiyyətidir (ASC). Ancaq bununla belə ölkə mediasında qurumun fəaliyyəti ilə bağlı şikayətlər bitib tükənmək bilmir.

Qeyd edək ki, hələ ötən ilin iyul ayında mətbuatda “Azəristiliktəchizat” ASC-nin sifarişçisi olduğu tenderlərdə maxinasiya hallarının olması barədə araşdırma yazı dərc edilmişdi.

““Azəristiliktəchizat” siyasi partiyanı maliyyələşdirir? (TENDER QALMAQALI)” başlıqlı sözügedən məqalədə “Azəristiliktəchizat” ASC-nin yüz minlərlə ölçülən tenderlərini “Alonya” və “Antalya” MMC-lərin udduğu bildirilirdi. Həmin yazıda hər iki MMC-nin qanuni təmsilçisi Xocavənd rayonunun Tuğ qəsəbəsi olan şirkətin qanuni təmsilçisi Əhədli Çingiz Yusif oğlunun Milli Dirçəliş Hərəkatı Partiyasının maliyyə məsələləri üzrə səlahiyyətli nümayəndəsi olduğu bildirilirdi.

Yazıda ən ilginc məqam isə Milli Dirçəliş Hərəkatı Partiyasının sədri Fərəc Quliyevlə “Azəristiliktəchizat” ASC-nin sədri “Əməkdar Mühəndis” Yaşar Həsənovun eyni rayondan - Ordubad rayondan olması yazılırdı...

831 min manatlıq tenderin qalibi kimdir?

PİA.az-ın araşdırma qrupu “Azəristiliktəchizat” ASC-nin sifarişçi olduğu bir sıra tenderlər üzərində araşdırma aparıb.

Qeyd edək ki, “Azəristiliktəchizat” ASC 2019-cu ilin sentyabr ayının 30-da 3 (üç) lot üzrə ümumi dəyəri 566532 (beş yüz altmış altı min beş yüz otuz iki) manat olub.

Eyni gündə yekun vurulan hər üç tenderin qalibi eyni şirkət – “Elektrogas” Məhdud Məsuliyyətli Cəmiyyəti (MMC) olub.

“Elektrogas” MMC bu ilin - 2020-ci ilin yanvar ayında “Azəristiliktəchizat” ASC-nin sifarişçi olduğu "Məsafədən nəzarət ölçü sistemləri və elektrotexniki avadanlıqlarının satınalınması" lotu üzrə dəyəri 264.707 manat olan daha bir tenderinin qalibi olub.

Beləliklə də “Elektrogas” MMC-nin “Azəristiliktəchizat” ASC-nin qalib olduğu tenderlərinin ümumi məbləği 831.239 manat təşkil edib.

Nizamnamə kapitalı 20 manat olan “Elektrogas” MMC 2018-ci ilin avqust ayının 13-də dövlət qeydiyyatına alınıb.

Şirkətin hüquqi ünvanı Yasamal rayonu, general Akim Abbasov keçəsi ev 1C, mənzil 22 ünvanıdır.

Şirkətin qanuni təmsilçisi isə Cəmilli Elnur Muxtar oğludur.

Bəs 258.850 manatlıq satınalmanın qalibi kimdir?

2020-ci ilin yeni başlamasına baxmayaraq, “Azəristiliktəchizat” Açıq Səhmdar Cəmiyyəti artıq bir neçə satınalmaya yekun vura bilib.

Belə ki, “Azəristiliktəchizat” ASC-nin 2020-ci ilin yanvar ayının 10-da "Modul tipli qazanxanaların daşınması və quraşdırılmasının satınalınması" lotu üzrə sifarişçi olduğu satınalmaya yekun vurub. Bu satınalmanın məbləği 21.600 manat, satınalmanın qalibi isə “EL-Rado” Məhdud Məsuliyyətli Cəmiyyətidir.

“Azəristiliktəchizat” ASC eyni gündə, yəni 2020-ci ilin yanvar ayının 10-da daha bir satınalmaya yekun vurub. “Xüsusi texnika, maşın və mexanizmilərin icarəsinin satınalınması” lotu üzrə sifariş olunan tenderin məbləği 237.250 manat, satınalmanın qalibi isə yenə də “EL-Rado” Məhdud Məsuliyyətli Cəmiyyəti olub.

“EL-Rado" Məhdud Məsuliyyətli Cəmiyyəti 2019-cu ilin aprel ayının 9-da dövlət qeydiyyatına alınıb.

Nizamnamə kapitalı 10 manat olan şirkətin hüquqi ünvanı Abşeron rayonu, Məmmədli kəndi, qanuni təmsilçisi isə “Azəristiliktəchizat” ASC-nin digər tenderlərinin qalibi olan “Elektrogas” MMC-nin qanuni təmsilçisi Cəmilli Elnur Muxtar oğludur.

PİA.az-ın araşdırması zamanı məlum oldu ki, “Azəristiliktəchizat” ASC-nin sifarişçi olduğu tender və kotirovkaların qalibi olan “Elektrogas” və “EL-Rado” MMC-lərin qanuni təmsilçisi 1979-cu il təvəllüdlü Elnur Cəmillinin atası Muxtar Cəmilli Musavat partiyasının fəallarından, daha doğrusu Musavat partiyasının Bərdə rayon təşkilatının sədr müavinidir. Məlumata görə bir zamanlar Musavat Partiyasının başqanının müşaviri kimi fəaliyyət göstərən Muxtar Cəmilli hakimiyyətə qarşı barışmaz mövqe sərgiləyən şəxslərdən sayılır.

“Azəristiliktəchizat” Açıq Səhmdar Cəmiyyətinin sifarişçi olduğu satınalmaların qalibi olan şirkətlərin qanuni təmsilçilərinin müxalif mövqeli partiyalara yaxın şəxslər olmasının bir təsadüf olub olmaması doğrudan da maraq doğuran məqamlardandır.

Qeyd edək ki, məsələ ilə bağlı PİA.az “Azəristiliktəchizat” Açıq Səhmdar Cəmiyyətinə sorğu yollayıb. Sorğunun yollanılmasından uzun müddət keçməsinə baxmayaraq heç bir cavab ala bilməmişik.

Twitter Facebook Myspace Stumbleupon Technorati blogger google
42 dəfə oxundu
 



XƏBƏR LENTİ
Loading...