“Qurtuluş 93”də ağacları kəsib obyekt tikirlər, sakinlər narazıdır – Fotolar
Sözügedən ərazidə yaşayan sakinlər bir daha Yeniavaz.com-a müraciət ediblər.
Onların sözlərinə görə, nəinki daha əvvəl quraşdırılan dəmir dirəklər sökülüb, hətta obyektin tikintisi daha da sürətlənib.
Sakinlər sözügedən ərazidən lentə aldıqları görüntüləri və fotoları da redaksiyamıza təqdim ediblər.
Kadrlarda tikintinin davam etdiyi açıq-aydın görünür. Həmin görüntüləri və fotoları təqdim edirik:
Məsələ ilə bağlı yenidən Abşeron Rayon İcra Hakimiyyətinə müraciət etdik. Qurumun mətbuat katibi Seymur Qasımbəyli Yeniavaz.com-a bildirib ki, sözügedən əraziyə iyunun 19-u səhər saatlarında baxış keçirilib və qeyri-qanuni tikinti dayandırılıb:
“Məsələ ilə bağlı müvafiq tədbirlərin görülməsi üçün aidiyyəti qurumlara məlumat verilib”.
S. Qasımbəyli qeyri-qanuni tikintinin sökülməsi işinin İcra Hakimiyyətinin səlahiyyətləri xaricində olduğunu bildirib.
Xatırladaq ki, daha əvvəl Ekologiya və Təbii Sərvətlər Nazirliyindən də Yeniavaz.com-a açıqlama verilmiş və sözügedən ərazidə bu ilin aprel ayında ağac kəsilməsi ilə bağlı araşdırma aparıldığı bildirilmişdi:
“Təbiətə dəymiş ziyan cinayət tərkibi yaratdığından məsələyə hüquqi qiymət verilməsi məqsədilə toplanmış sənədlər Baş Prokurorluğa göndərilib”, - Nazirliyin məlumatında qeyd olunur.
