"Heydər Əliyev həmişə xətrimi istəyib" - Flora Kərimova
Xalq artisti dövlətin ona münasibətindən danışıb “Heç vaxt şəxsiyyətimə toxunacaq söz deyilməyib”
Azərbaycanın xalq artisti Flora Kərimovanın efirlərdən uzaqlaşdırılmasının səbəbləri zaman-zaman ölkə mediasının gündəmində olub. Ancaq xalq artisti özü heç vaxt məsələyə ətraflı münasibət bildirməyib.
Bizimyol.info-a açıqlamasında o, belə olmasının gerçək səbəblərindən danışıb: “Əslində efirdən uzaqlaşdırılmağıma kimsə tapşırıq verməyib. Bir neçə il əvvəl mən Azərbaycana qarşı mövqeyinə görə Fransanın dövlət bayrağını efirdə cırmaq istədim. Gördüm alınmadı. Sonra elə həmin efirdə Fransanın dövlət bayrağını yerə atıb tapdaladım. Bu diplomatiya dilində təhqirdir. Özü də bunu bir dövlətin tanınan siması, xalq artisti edirsə, qarşı tərəf, yəni Fransa dövləti də bunu sərt qarşılayıbsa təbii ki, dövblətin mühim siması buna münasibət bildirməli idi. O zaman da Azərbaycanın dövlət başçısı, yəni həmin siması mərhum Heydər Əliyev idi. Heydər Əliyev ustalıqla bu məqamı edəcək yeri gözləmişdi. O mənim xətrimi həmişə istəyib. Heç zaman şəxsiyyətimə toxunan söz, ifadə işlətməyib. Həmin ərəfədə sənət adamlarının mükafatlandırılması mərasimi keçirilirdi. O, bircə kəlmə işlədib orda baş verən hadisəyə münasibət bildirib. Demişdi ki, “bir müğənnimiz də Fransanın dövlət bayğarını tapdalayıb”, sözünün gerisiycə gülümsəmişdi. Onu tanıyanlar bilir ki, bu onun etiraz jestidir. Başqa heç bir yerdə Heydər Əliyev bir kəlmə belə barəmdə mənfi fikir söyləməyib. Amma qarşıdakılar o qədər savadsız və anlayışsız oldular ki, bunu sözlə ifadə eləmək çətindir. Həm də onların əlinə yaxşı fürsət düşdü. Mərhum prezidentin o sözünü əsas tutub məni efirlərdən uzaqlaşdırdılar. Heydər Əliyev efirdən çıxarılmam haqda kimsəyə göstəriş verməmişdi. Hətta konsertlərdən birində “”Flora yoxdur, o niyə oxumur?” soruşduğunu dəqiqi bilirəm”.
