“Qərb Ankaranın terrorçu hesab etdiyi şəxsləri azadlığa buraxır” - Ərdoğan
“Ankara terrorçu kimi tanıdığı və barələrində məlumat təqdim etdiyi şəxsləri Qərb azadlığa buraxır”. APA-nın “TASS”a istinadən verdiyi xəbərə görə, bu sözləri Türkiyə prezidenti Rəcəb Tayyib Ərdoğan ABŞ-ın Merilend ştatında yeni məscidin açılış mərasimində çıxışı zamanı deyib. Qeyd edək ki, bu məscid ABŞ-da ən iri İslam mərkəzi hesab edilir.
“Biz terrorçularla 35 ildən çoxdur ki mübarizə aparırıq. Terrorçuların əməlləri ucbatından biz 40 min insan itirdik. Buna baxmayaraq, Qərb, terrorçu kimi tanıdığımız şəxsləri azadlığa buraxır. Brüsseldə hücum törədən şəxs terrorçu olub, biz onun barəsində Belçika hökumətini məlumatlandırmışdıq”, - deyə Ərdoğan bildirib.
Türkiyə prezidenti həmçinin qeyd edib ki, Belçika terrorçu barədə məlumatlandırıldıqdan sonra heç bir tədbir görməyib.
