Marşrut sahiblərinə verilməli olan 7 milyonu kimə peşkəş ediblər? - Vüsal Kərimlidən nə zaman hesab sorulacaq?
DİA.AZ xəbər verir ki, məsələyə münasibət bildirən Bakı Nəqliyyat Agentliyinin (BNA) İdarə Heyəti sədrinin müşaviri Faiq Abbasov dövlətin daşıyıcı şirkətlər üçün ayırdığı 7.5 milyon manatın "BakuBus” MMC-yə ayrıldığını bildirib.
İctimai Televiziyada çıxış edən BNA rəsmisi Bakı şəhərində sərnişindaşımanın böyük hissəsini həyata keçirən özəl daşıyıcı şirkətlərə ayrılmış vəsaitin hansı səbəbdən onlara ödənilməməsi ilə bağlı fikir bildirməyib. O, 7.5 milyon manatın "BakuBus”a pandemiyanın nəticələrinin aradan qaldırılması ilə bağlı verildiyini qeyd edib.
Qeyd edək ki, özəl daşıyıcı şirkətlər dövlət rəhbərliyinə müraciət edərək, 2020-ci ildə pandemiya ilə əlaqədar sənişindaşımaya dəstək məqsədilə dövlətin ayırdığı vəsaitin onlara verilmədiyini bildiriblər. Həmin dövrdə "BakuBus” MMC Bakı Nəqliyyat Agentliyinin tərkibində fəaliyyət göstərib.
Onu da qeyd edək ki, Nazirlər Kabinetinin müvafiq qərarında 7.5 milyon manatın BNA vasitəsilə sərnişindaşıma fəaliyyəti ilə məşğul olan şirkətlərə ödənilməsi tapşırılıb. Lakin vəsaitin hamısı BNA həmin vaxt öz tərkibində olan "BakuBus” MMC-yə köçürüb.
Hüquq-mühafizə orqanlarının və aidiyyəti qurumların məsələyə reaksiya verəcəyi gözlənilir.
Gundeminfo.az olaraq qeyd edək ki, Bakubus MMC faktiki olaraq Vüsal Kərimlinin yaxın qohumları, dostları tərəfindən idarə edilir. Bu o deməkdir ki, BNA rəhbəri hər kəsə çatmalı olan, xüsusilə də sərnişindaşımada iştirakçı olan sahibkarlara da çatmalı olan pulları dolayı yollarla özünə götürüb. Mövzu ilə bağlı qarşı tərəfin də mövqeyini dinləməyə hazırıq.
