Tramp onlarla ölkəyə qarşı yeni gömrük rüsumları tətbiq etdi - Ticarət savaşı
ABŞ Prezidenti Donald Tramp ticarət savaşının yeni mərhələsini başladaraq Yaponiya və Cənubi Koreya kimi əsas Asiya ixracatçıları ilə yanaşı, bir sıra az əhəmiyyətli tədarükçüləri də 1 avqustdan etibarən gömrük rüsumlarının əhəmiyyətli dərəcədə artırılması barədə xəbərdar edib.
Qaynarinfo xəbər verir ki, bu barədə "Reuters” məlumat yayıb.
25%-lik idxal rüsumlarının tətbiqi barədə açıqlama Uol-Stritdə ciddi reaksiya doğurub və S\&P indeksində kəskin enişə səbəb olub, halbuki Asiya bazarları bu xəbəri nisbətən sakit qarşılayıb.
Trampın sözlərinə görə, ABŞ 1 avqustdan etibarən Qazaxıstan, Malayziya və Tunisdən gətirilən məhsullara 25%, Bosniya və Herseqovina ilə Cənubi Afrikadan – 30%, İndoneziyadan – 32%, Banqladeş və Serbiyadan – 35%, Kamboca və Tailanddan – 36%, Laos və Myanmadan idxala isə 40% gömrük rüsumu tətbiq edəcək.
Tramp bu barədə 14 ölkəyə məktublar göndərib. Məktublarda o, əlavə danışıqlara açıq olduğunu bildirsə də, eyni zamanda qarşılıqlı tədbirlərdən çəkinmələri üçün xəbərdarlıq edib:
"Əgər siz hər hansı səbəbdən öz rüsumlarınızı artırmaq qərarına gəlsəniz, seçdiyiniz hər bir əlavə bizim tətbiq etdiyimiz 25%-ə əlavə ediləcək”, – deyə Tramp Yaponiya və Cənubi Koreyaya ünvanladığı və Truth Social platformasında dərc olunan məktublarda bildirib.
"Reuters”ə danışan Avropa İttifaqı rəsmilərinin sözlərinə görə, Aİ bu barədə xəbərdarlıq məktubu almayacaq.
Artırılan rüsumlar 1 avqustdan qüvvəyə minəcək və öncədən elan edilmiş avtomobil, polad və alüminium kimi sahələrə tətbiq olunan tariflərlə cəmlənməyəcək.
Bu o deməkdir ki, məsələn, ABŞ-a idxal olunan yapon avtomobillərinə tətbiq edilən 25%-lik rüsum əvvəlki səviyyədə qalacaq və bəzi digər tariflərdə olduğu kimi 50%-ə yüksəlməyəcək.
Bununla belə, Tramp bazar ertəsi partnyor ölkələrə əlavə vaxt tanıyaraq, ticarət sazişlərinin imzalanması üçün son tarixi çərşənbə günündən 1 avqusta qədər uzadıb. Eyni zamanda bildirib ki, bu tarix yekun sayılmasına baxmayaraq, ABŞ administrasiyası tərəfdaşlardan gələn alternativ təklifləri dinləməyə və müzakirə etməyə hazırdır.
