Ukrayna əks-hücumda 12 briqadanın 3-dən istifadə edib, əsas döyüş qarşıdadır - "Reuters"
Qərb analitikləri bildirirlər ki, Ukrayna qoşunlarının əks-hücum əməliyyatı artıq bir həftədir ki, davam edir, lakin Kiyev təlim keçmiş hissələrin yalnız kiçik bir hissəsindən istifadə edib və əsas döyüşlər hələ qabaqdadır.
Qaynarinfo xəbər verir ki, bu barədə "Reuters" yazır.
"Bir həftəlik şiddətli döyüşlərdən sonra Kiyevin əks-hücumunun əsl sınağı hələ qarşıdadır, belə ki, Ukrayna qoşunları Rusiyanın əsas müdafiə xəttindən müəyyən məsafədə yerləşir və qüvvələrin əsas hissəsi döyüşə hazırlaşır. Hücum hələ də gözləmə rejimindədir”, - məqalə müəllifi yazır.
Müharibəni yaxından izləyən polşalı hərbi analitik Konrad Muzıka qeyd edir ki, Ukrayna indi əks-hücum üçün təlim keçmiş 12 briqadadan yalnız 3-nü işə salıb.
Analitiklərin fikrincə, Ukrayna əks-hücum əməliyyatını həyata keçirmək üçün 12 zirehli briqada yaradıb, onlardan doqquzu Qərb tərəfindən təlim və təchizat alıb. Bir briqadada adətən ən azı 3500-4000 əsgər olur. Kiyev həmçinin bəyan edib ki, Daxili İşlər Nazirliyi 40 min əsgərdən ibarət 8 hücum briqadasına təlim keçib.
Analitiklər bildirirlər ki, Ukraynanın əsas qüvvələri Zaporojye vilayətinin Orexov şəhəri və Donetsk vilayətinin Velikaya Novosyolka yaxınlığında, təxminən 80 kilometr şərqdə cəmləşib.
"Bu, ukraynalı generalların gözlərinin cəbhə xəttindən təqribən 25 km aralıda yerləşən Zaporojye vilayətinin işğal olunmuş Tokmak şəhərində olduğunu göstərə bilər. Daha 50 km Melitopol şəhəridir. Hər iki yaşayış məntəqəsi yaxşı möhkəmləndirilib", "Reuters" yazır.
Nəşr xatırladır ki, Velikaya Novosyolka yaxınlığında Ukrayna Silahlı Qüvvələri dörd kəndi azad edib.
Müdafiə nazirinin müavini Anna Malyarın sözlərinə görə, qoşunlar cənub cəbhə xəttinin 100 kilometrlik hissəsi boyunca 6,5 km irəliləyib və 90 kvadrat kilometr ərazini geri alıb. Çərşənbə günü o, son 24 saat ərzində müxtəlif hissələrdə 300-350 metr irəliləyiş olduğunu bildirib.
Muzıka hesab edir ki, əvvəlcə əks-hücum kifayət qədər yaxşı gedirdi, lakin bu əsas mərhələnin başlamasından 5 və ya 6 gün sonra irəliləyiş sanki dayanıb. Ancaq bunun niyə baş verdiyini analitik bilmir.
Reuters yazır ki, əks-hücum hava qüvvələrinin çatışmazlığı ilə çətinləşir. Kiyev F-16 qırıcıları üçün aylardır Qərbə lobbiçilik edir, lakin hələ də onları ala bilməyib.
O da bildirilir ki, Rusiya prezidenti Vladimir Putin artıq Kiyevin əks-hücumunu uğursuz və böyük itkilərlə nəticələnən əməliyyat adlandırıb.
Eyni zamanda, Muzıkanın fikrincə, Ukrayna "Bradley”lərin 15%-ə qədərini və "Leopard 2” tanklarının bir neçə faizini itirmiş ola bilər, lakin bu maşınların bir hissəsinin Ukrayna hərbçiləri tərəfindən götürülərək təmirə göndərilməsi də mümkündür.
Bu arada, RUSI analitik mərkəzinin hərbi analitiki Cek Uotlinq hücumun uğurlu və ya uğursuz olduğunu söyləmək üçün hələ tez olduğunu vurğulayıb.
Ukraynanın əks hücumu təxminən bir həftə əvvəl başlayıb. Lakin Rusiya da buna hazırlaşıb və minlərlə müdafiə mövqelərini təchiz edib - Ukraynanın şərqində müvəqqəti olaraq ələ keçirilən ərazilərdən tutmuş işğal olunmuş Krıma qədər: bunlar minalanmış sahələr, tank əleyhinə arxlar, beton "əjdaha dişləri" barrikadaları və səngərlərdir.
"Reuters"in aprel ayında peyk görüntüləri vasitəsilə təhlil etdiyi bu mövqelərin əsasən Kiyevin Krım yarımadası ilə Rusiyanın quru əlaqəsini kəsmək və beləliklə də Kreml qüvvələrini parçalamağa çalışdığı strateji əhəmiyyətli cənub bölgəsində cəmləşdiyi bildirilir.
